ఆ కౌరవ పాంసనులు నా శాంతి వచనాలెలా వింటారు. అవి ఎంత చెడ్డా చచ్చు పుచ్చు మాటలే గదా. నిత్యోల్లాస శీలురైన వారి మనస్సుకవి ఉత్సాహమెలా కొలుపగలవు. అలాంటి కౌతుకమే వారికి కలగాలంటే అంతకన్నా ఆడంబరంగా వినిపించే రణరణధ్వనులే కావాలి. అవి ఏవోకావు. యమధర్మరాజు వాహనమైన దున్నపోతు మెడలో గట్టిన ఘంటానాదములే సుమా - ఎంతో ఆలస్యం కూడా లేదవి వారి చెవిని బడటానికి. అవి వినాలని ఎంతో వేడుకతో చెవులు రిక్కించుకొని దిక్కులు చూచే వారికి నా శాంతి వాక్యాలెలా వినబడతా యంటాడు పరమాత్మ. ఏమిటీ మాట కర్థం. ఆకౌర వాధము లెట్లాగూ యుద్ధంలో అంతా కట్టగట్టుకొని చావదలచారు గాని బ్రతకాలనే భావమొక్కరికీ లేదు. అలాంటి మొండితనమున్న వాళ్లునా మాట లెలాగూ వినరు. కయ్యానికి కాలుదువ్వుతారు. ఆ హోమకుండంలో సపరివారంగా పూర్ణాహుతి అయిపోతారు. దానితో నీ ప్రతీకార వాంఛ కూడా అప్రయత్నంగానే నెరవేఱుతుంది. నీవు కోరుతున్నదీ అదే గదా. ఇంత అంతరార్థ మిమిడి ఉన్న దిందులో. అంతే గాదు దుష్ట శిక్షణ - శిష్ట రక్షణ చేసి ధర్మ సంస్థాపన గావించకపోతే నేను లోకంలో అవతరించి ఏమి ప్రయోజన మనే మహార్థం కూడా ఒకటి తొంగిచూస్తున్నదీ మాటల్లో.
11. ఇంత లోతైన భావంగల ఈ పద్యానికి సంతరించిన రచన చూడండి ఎంత సౌందర్యాన్ని చిందుతున్నదో. ' యమమహిష ' అనే మాట మొదలు కొని ' కౌరవులు' అనే మాట వరకూ మూడున్నర చరణాలు కేవల మారోహణ మార్గంలో నడిస్తే తతిమా ఆ కొంచెమూ అవరోహణంలో నడుస్తుంది.
Page 25
