Index

శ్రీ విష్ణు సహస్రనామ అంతరార్థము

నామం	అంతరార్థము
స్వస్తిభుక్ స్వస్తి దక్షిణః	అయితే ఊరక రాదా అనుభవం. మనం స్వస్తి అనుకొనేదంతా దానికి దక్షిణగా సమర్పించాలి. తప్పదు.
అరౌద్రః కుండలిచక్రీ విక్రమీ ఊర్జితశాసనః	ఎలా ఉంటుందా అనుభవం. రుద్ర అంటే ప్రాణం. ప్రాణచలనం లేనిదది. (కుండలీ) ఆది మధ్యాంతరహితం చక్ర- సర్వతోముఖం. విక్రమ-విశేషమైన నామరూప ప్రపంచంగా భాసించేది. భాసిస్తూ మరలా దాని మీద గొప్ప అధికారం గలిగినది.
శబ్దాతిగః శబ్దసహః శిశిరః శర్వరీకరః	స్పందరూపమైన వాక్కున కందనిది. వాక్కును భరించేది-భరించి అచలంగా నిలిచి ఉండేది. (శిశిర) (అతిశయేన శేతే ఇతి శిశిర). అలాటి యోగనిద్రలో తానుంటూ మనకీ అజ్ఞానమనే గాఢ నిశీధాన్ని (శర్వరీ) కల్పించినది.
అక్రూరః పేశలః దక్షః దక్షిణః క్షమిణాంవరః	కల్పించినా క్రౌర్యం లేదా పరమాత్మకు. పేశల-దయార్ధ స్వభావుడే. దక్ష-సర్వసమర్థుడు కూడా. (దక్షిణ) వక్రమైనది కాదా సామర్థ్యం. ఋజువైనది. ఋజుస్వభావుడు కనుక క్షమించగలడు. కాని మన మాయనను వరిస్తేనే క్షమించి మరలా మనలను వరిస్తాడు.
విద్వత్తమః వీతభయః పుణ్యశ్రవణ కీర్తనః	విద్వత్తముడాయన. అన్నీ అర్థం చేసుకోగలడు. అద్వితీయుడు గనుక ఏ భయమూ లేదాయనకు. తత్సాంగత్యంతో మనకూ లేదు భయం. జీవుడు తాను శ్రవణం చేసి మరొకరికి కీర్తనం చేస్తే చాలు. పవిత్రుడయిపోతాడు.
ఉత్తారణః దుష్కృతిహా పుణ్యః దుఃస్వప్ననాశనః	ప్రసన్నుడయి ఆయనే ఈ సాధకుణ్ణి గట్టున పడవేస్తాడు. వీడి సంచిత కర్మనంతా పటాపంచెలు చేస్తాడు. పునాతీతి పుణ్యః సత్త్వాన్ని శుద్ధి చేస్తాడు. కోట్లజన్మలనుంచీ వీడు కనే సంసారమనే పీడకలను రూపుమాపుతాడు.

Page 62

బ్రహ్మశ్రీ యల్లంరాజు శ్రీనివాస రావు