Index

కర్మసన్యాస యోగము భగవద్గీత

  బ్రహ్మంతో యోగ మంటే అది సమాధి. వ్యవహారంలో కూడా బ్రహ్మమే. కాబట్టి ఎప్పుడూ సమాధే. దానితో యుక్తమైన ఆత్మవాడిది. వాడి అంతః కరణ మెప్పుడూ బ్రహ్మ భావనతోనే నిండి ఉంటుంది. ఇక ప్రపంచ దృష్టికి చోటెక్కడిది.

  చోటు లేకపోతే ఉన్న దంతా బ్రహ్మమే. బ్రహ్మమనేది బాహ్య ప్రపంచం లాగా పరిమితం కాదు. అల్పంకాదు. తాత్కాలిక మంత కన్నా కాదు. దేశకాలా వధులు లేవు దానికి. అలాంటి బ్రహ్మాన్ని పట్టుకొన్నాడు వీడు. పట్టుకొన్నాడు కాదు. బ్రహ్మ మయమయి పోయింది వాడి మనస్సు. కనుక బ్రహ్మ మెలా ఉందో వీడూ అలాగే ఉండిపోతాడు. ఎలా ఉంది బ్రహ్మం. విజ్ఞాన మానందం బ్రహ్మ అన్న దుపనిషత్తు బ్రహ్మం జ్ఞాన స్వరూపం. అలాగే వాడూ జ్ఞాన స్వరూపుడు. అది ఆనందాత్మకం వీడిదీ ఆనందమే ఎలాంటి ఆనందమది. సుఖ మక్షయ మశ్నుతే అని హామీ ఇస్తున్నది గీత. క్షయం లేని ఆనందం శాశ్వతమైనది. బ్రహ్మం శాశ్వత మయినప్పు డానంద మశాశ్వత మెలా అవుతుంది. అలాంటి శాశ్వతానంద మీ బ్రహ్మీభూతుడైన జ్ఞానికీ లభించి తీరుతుంది. అందుకే సాధకుడైన ప్రతివ్యక్తీ ఎలా ఉండాలో చెబుతున్నారు భాష్యకారులు. తస్మాత్ బాహ్య విషయ ప్రీతేః క్షణి కాయాః ఇంద్రియాణి నివర్తయే దాత్మని అక్షయ సుఖార్దీ. క్షణికమైన బాహ్య విషయప్రీతికి అర్రులు చాచకుండా మానవుడు అక్షయమైన బ్రహ్మానందమే కోరినవాడైతే తన ఇంద్రియాలను వాటి నుంచి ఎప్పటికప్పుడు వెనక్కు మళ్లించుకోవా లంటారాయన.

Page 424

బ్రహ్మశ్రీ యల్లంరాజు శ్రీనివాస రావు