కర్మసన్యాస యోగము
భగవద్గీత 
విద్యావినయసంపన్నే బ్రాహ్మణే గవి హస్తిని |
శుని చైవ శ్వపాకే చ పండితాః సమదర్శినః || 18 ||
సరే - జీవితాంతంలో వాడు ముక్తుడయి పోతాడు. మరలా వెనక్కు వచ్చే ప్రశ్నే లేదని చెప్పారు. బాగానే ఉంది. అలాంటి సిద్ధి కలగాలంటే అది ఒక్కసారిగా లభించేది గాదు. పైగా క్రొత్తగా సంప్రాప్తమయ్యేది గాదు. మొదటి నుంచీ ఉండాలది. అంతకుముందు లేనిది క్రొత్తగా వచ్చిందని చెప్పాడంటే ఎలా వచ్చిందో అలా తొలగిపోయే ప్రమాదముంది. లేనిదిరాదు ఉన్నది పోదని గదా గీతా సిద్ధాంతం. అలాంటప్పుడు జ్ఞాని జీవిత మంతమయి పోయే టప్పుడే గాక జీవిత కాలంలో కూడా అదే స్థితిలో ఉండి తీరాలి. ఉంటాడా. ఉంటే ఎలా ఉంటాడు. లోకంలో నలుగురి మధ్యా జీవిస్తున్నప్పుడు వాడి దైనందిన జీవితమెలా నడుస్తుంటుంది. వాడి దృష్టి ఈలోక వ్యవహారంలో బడి ఎలా నలిగిపోకుండా బ్రహ్మాకారంగానే సాగి పోతుంటుంది వర్ణించగలరా అని అడిగితే వర్ణించి చెబుతున్న దిప్పుడు.
ఆత్మ జ్ఞాన ముదయించి వాడి అజ్ఞానం చీకటిలాగా విరిసిపోయిం దని ఎప్పుడు చెప్పామో అప్పుడిక నామరూపాలనే చీకటి పిసరు మిగలకూడదు వాడికి. అంతా వెలుగే. తానూ వెలుగే తాను చూచేదీ వెలుగే. జ్ఞానమే ఇక్కడ ప్రకాశం. అది తనలోనూ చూస్తుంటాడు. తనకు కనిపించే ప్రపంచంలోనూ చూస్తాడు. సర్వత్రా పరుచుకొని కనిపిస్తుందది. అంతటా సమానంగా వ్యాపించి ఉంటుందది. పండితా స్సమదర్శినః అలా సమంగా వ్యాపించిన ఆ చైతన్య జ్యోతిని దర్శిస్తాడు గనుకనే వాడు సమదర్శి. అప్పుడేవాడు పండితుడు. పండా ఆత్మ విషయా బుద్ధిః అని
Page 416
బ్రహ్మశ్రీ యల్లంరాజు శ్రీనివాస రావు