సాంఖ్య యోగము
భగవద్గీత 
దీనికి భిన్నంగా ఆత్మ అంటే ఏమిటో ఉన్నదున్నట్టు పట్టుకొనే జ్ఞానమైనా ఆ జ్ఞానానికి తోడు పడే యోగమైనా సరే. అది వ్యవసా యాత్మకమైన దృష్టి. నూటికి కోటి కెవడికో ఒకడి కలవడుతుంది. అలవడితే చాలు. ఆ ఏకైకమైన దృష్టితో ఉన్నవాడి కెప్పుడూ భయం లేదు. ఆత్మ అనే గమ్యం వైపే చేస్తున్న ప్రయాణమది. కర్మయోగమైనా అది జ్ఞానంతో కలిసి అటువైపే పయనిస్తుంది. యమున గంగలో కలిసి చివరకు సాగరంలో ప్రవేశించినట్టు రెండూ కలిసి ఏకైకమైన దృష్టిగా మారి ఆత్మ చైతన్యంలోనే చేరిపోతాయి. కాబట్టి సంసార చక్రభ్రమణం నుంచి తప్పించి నిన్ను బయటపడవేస్తుందీ బుద్ధి.
యామిమాం పుష్పితాం వాచం ప్రవదంత్యవిపశ్చితః |
వేదవాదరతాః పార్థ నాన్యదస్తీతి వాదినః || 42 ||
ఇలాటి వ్యవసాయాత్మకమైన బుద్దిలేని మానవుల జీవిత విధానమేమిటో వారి ఆలోచనలూ మాటలూ ఎలా ఉంటాయో బయట పెడుతున్నా రిప్పుడు. మానవులంటే పామర జనమే గాదు. పండితులమని విర్రవీగే మీమాంసకాదులు కూడా ఇలాటి వారేనంటారు వ్యాసభగవానులు. యా మిమాం పుష్పితాం వాచం ప్రవదం త్యవిపశ్చితః - అవిపశ్చితః - అవివేకులే వారందరూ. పుష్పితాం వాచం పుష్పంలాగా చూడటానికీ వినటానికీ రమ్యంగా ఉంటుంది వారి ప్రసంగం. Flowery Language అనే ఆంగ్ల శబ్దానికెంత అతికినట్లుందో చూడండి ఈ పుష్పితాం వాచ మనే సంస్కృత శబ్దం. అక్కడ దానికేమని అర్ధమో
Page 136
బ్రహ్మశ్రీ యల్లంరాజు శ్రీనివాస రావు