ఉత్తరార్ధము - ఆరోహణ క్రమము
శాస్త్రమనేది 'అటు గురువులకూ ఇటు శిష్యులకూ నడుమ నిర్పడిన ఒక వంతెన లాంటిది. తాను తరించి తన శిష్యులకు గూడ తరణోపాయాన్ని ఉపదేశించాలి గురువు. దానికి సాధనం శాస్త్ర జ్ఞానమే. అది గురువుకు అనుభవరూపమైతే శిష్యుడికి శ్రవణమననాది రూపం. అద్దరినీ ఇద్దరినీ కలిపేది శాస్త్ర ప్రమాణం. సారమంటే ప్రమాణమనే అర్థం.
6. శివ జ్ఞాన ప్రదాయినీ
శాస్త్రమే ప్రమాణం కావచ్చు. కాని శాస్త్రమనేది ఒక ఆత్మ జ్ఞానమే కాదుగదా. ధర్మ జ్ఞానం కూడా మనకు బోధిస్తున్నది. రెండు విధాలుగా ప్రవర్తిస్తుంటుంది శాస్త్రం. ధర్మం కోసమొకటీ. బ్రహ్మం కోసమొకటీ. అలాంటపుడు శాస్త్రమంతా ఆత్మ జ్ఞానం కోవమే అని ఎలా నిర్ణయించగలం.
ఇలాంటి సంశయాన్ని తొలగిస్తున్నదీ నామం. శివ సంబంధమైన జ్ఞానం శివ జ్ఞానం. దాన్ని మనకు ప్రదానం చేస్తుంది కాబట్ట దేవికి శివ జ్ఞాన ప్రదాయిని అని పేరు. జ్ఞానమనేది రెండు విధాలు. ఒకటి శివం. వేరొకటి అశివం. ఇందులో మిధ్యా భూతమైన జగత్తుకు చెందినవి గనుక లోక జ్ఞానం మొదలు ధర్మ జ్ఞానం వరకు అన్ని జ్ఞానాలూ అశివమే. ఇతర జ్ఞానాల కంటే ధర్మ జ్ఞానమనేది ప్రశస్తతరమని నీకు తోచినా- ఆలోచిస్తే అది కూడా శివ జ్ఞాన మనిపించుకోదు. ఎందుకంటే స్వర్గాది అనిత్య సుఖానుభవంతోనే అది సమసి పోతున్నది. యదేహ కర్మ చితో లోకః క్షీయతే- తథా అముత్ర పుణ్యచితోపి క్షీయతే అని శాస్త్రమే దాని అనిత్యత్వాన్ని బయట పెడుతున్నది. కాబట్టి ధర్మ జ్ఞానం కూడా వాస్తవానికి అశివమే.
Page 72
బ్రహ్మశ్రీ యల్లంరాజు శ్రీనివాస రావు