ఈశావాస్యమన్నట్లు నామరూపాలనే బురఖా వదిలేసి మరలా ఇది మన కనామరూపమైన ఆత్మ చైతన్యంగానే దర్శనమిస్తుంది. అంటే సంసారమే సాయుజ్యమవుతుంది. ఎటువచ్చి అలా దృష్టి మార్చుకొని చూడటమే మన మభ్యసించాలి. మానసికమైన ఈ అభ్యాసమే మనం చేయవలసిన సాధన అంతా. ఇంతకన్నా బాహ్యమైనదేదీ కాదు. సూక్ష్మంలో మోక్షమంటే ఇదే. ఆ సూక్ష్మం తెలుసుకొంటే అంతకన్నా సులభం లేదు. తెలియకుంటే అంతకన్నా కష్టం లేదు. గొప్ప సుకృతముంటే స్వయంగానే తెలుస్తుందది. కొంత ఉంటే గురూపదేశం వల్ల తెలుస్తుంది. అసలే లేకుంటే బహుజన్మలు పడుతుంది.
ప్రారబ్ధ కర్మ
అయమమృత విధానం నాయ కో ప్యోష ధీనాం
శత భీష గను యాతః - శంభుమూరో వతంసః
విరహయతి నచైనం రాజ యక్ష్మా శశాంకం
హతవిధి పరి పాకః - కేనవా లంఘనీయః
అమృతానికి నిలయం చంద్రుడంటే. చంద్రుడిలో ఉండే అమృతాన్ని తాగే ముక్కోటి దేవతలూ అమరులయ్యారు. అలాంటి అమృతమే తనలో ఉన్న చంద్రుడికి మరణ మెక్కడిది. మరణం లేకపోవచ్చు. కాని బ్రతికినంత కాలం రోగాలతో బాధపడవచ్చు గదా అంటే ఓషధులున్నాయతని దగ్గర. అంతేకాదు. శతభిష గనుయాతః వందల కొద్దీ వైద్యులు చుట్టు కొలువున్నారు చికిత్స చేయటానికి. శతభిష క్కంటే శతభిషా నక్షత్రమనీ శతభిషక్కులనీ అర్థం చెప్పవచ్చు ఈ మాటకు. ఇలాటి ఘనవైద్యులే కాదు. అసలు హాలాహలం లాంటి విషాన్నే మింగి ఆరగించుకొన్న పరమేశ్వరుడి శిరస్సునే అలంకరించినాడు తాను. అలాటివాడికి జరావ్యాధి మరణాలకు ఎంత దూరం చెప్పండి. మరి ఇన్ని శక్తులున్నా క్షయ రోగంతో బాధపడుతూనే ఉన్నాడా చంద్రుడు. రాజయక్ష్మమంటే క్షయ. రోగాలన్నిటికీ రాజది.
Page 170
బ్రహ్మశ్రీ యల్లంరాజు శ్రీనివాస రావు