Index

శ్రీ విష్ణు సహస్రనామ అంతరార్థము

నామం	అంతరార్థము
ఉగ్రః సంవత్సరః దక్షః విశ్రామః	ఉచ్ఛమైన స్థితి అది. సమస్తమూ అందులోనే చక్కగా వసిస్తున్నది. దక్ష - అందుకే సర్వసమర్థమైనది. అక్కడే విశ్రాంతి ఈ సాధకుడికి. శ్రాంతి లేనిదేదో అది విశ్రాంతి. శ్రాంతి ఈ సాంసారికమైన తాపత్రయమే. అది లేని స్థానం గనుక విశ్రామం.
విశ్వదక్షిణః	అయితే దాని నందుకోవాలంటే విశ్వంమీద భ్రాంతి ఉండ కూడదు. దీనినంతా దక్షిణగా సమర్పించాలి దానికి.
విస్తారః స్థావర స్థాణుః	ఆ విశ్రాంతికూడా ఎంతో విస్తీర్ణమైనది. ఎప్పుడూ సంకుచితం కాదు. స్థావరస్థ - స్థావరంగా ఉండే అణు అణువది. అతి సూక్ష్మమైనది.
ప్రమాణం బీజమ్ అవ్యయమ్	దానికేమిటి ప్రమాణమని ప్రశ్నలేదు. దానికదే ప్రమాణం. జ్ఞానం కనుక స్వతః ప్రమాణమది. మిగతా ప్రత్యక్షాది ప్రమాణాలకూ వాటికి గోచరించే ప్రమేయాలకూ బీజం ప్రవర్తకమిది. అవ్యయం. తాను మారకుండా వీటి మార్పును గమనిస్తుంటుంది.
అర్థః అనర్థః	అర్థమూ అదే అనర్థమూ అదే. దాన్ని అర్థించే సాధకుల కర్థం. అర్థించని పామరుల పాలిటికదే అనర్థం.
మహాకోశః మహాభోగః మహాధనః	అది ఒక గొప్ప కోశం. నిధి. నిధిలాగే చాలా గుప్తంగా ఉన్నది. మహా+ఆ భోగ. చాలా విశాలమైనది. సమృద్ధమైనది. ఏ ధనమూ పనికిరాదు దాని దగ్గర. మహాధనం. ప్రపంచమంతా దాని ధనమే.
అనిర్విణ్ణః	అందుకే దానికి నిర్వేదం లేదు. ఎప్పుడూ తృప్తిగా ఉంటుంది. దానినందుకొంటే మనకూ తృప్తే. కాని విసుగు చెందరాదు సాధకుడు. అనిర్విణుడయి ఉండాలి.

Page 36

బ్రహ్మశ్రీ యల్లంరాజు శ్రీనివాస రావు